Kisha e “Shën Mërisë“ Barmash, Kolonjë, Viti 1616

Kisha e "Shën Mërisë" gjendet në hyrje të fshatit Barmash të Kolonjës. Kisha përbëhet nga naosi, narteksi dhe hajati. Naosi është njënefësh dhe ka përmasa të brendshme 11.30x4.60 metra. Hajati zgjatet në faqen jugore të kishës. Muratura e kishës përbëhet nga gurë të papërpunuar të lidhur ndërmjet tyre me llaç gëlqereje. Muratura e hajatit është me gurë të lidhur me baltë dhe është e përforcuar me breza druri. Apsida e kishës është trifaqëshe [1] .

Kisha është pikturuar në vitin 1616. Këtë fakt e vërteton një mbishkrim që gjendet i pikturuar mbi faqen e murit verior të kishës: Ανεστοριθυ ουτος ναος (της Υπεραγιας Δεσποίνης ημων / Θεοτόκου και αειπαρθένου μαριας δηα συν(δρομης κόπου τε καί εξό / δου)...του ιερεος Κ....Ανδρεα...ο αρχιερατευ / οντος .../ Μητροπολιτου (Καστορίας) Κυρ Κυρ Δαβηδ. Επη ετους / - 1616. “U pikturua ky tempull i gjithnderuar i së mbishënjtës, zonjës sonë Hyjlindëse dhe gjithmonë virgjëreshës Mari me kontributin përpjekjet dhe shpenzimet ...të priftit zotit Andrea....në kohën kur ishte peshkop...të mitropolitit të Kosturit zotit, zotit, zotit, David, në vitin 1616” [2] . Mbi ikonën e Shën Triadhës në ikonostas është shkruar: δ(ε)ησις τών δούλων του Θ(εο)ύ κωνσταντίνου ιερέος κόστα, βασίλη Ιωάννου, στεφάνη καί πέτζο καί τόν γονέων 1785. “Lutje e shërbëtorëve të perëndisë prift Kostandinit, Kostës, Vasilit, Janit, Stefanit dhe Peços dhe të prindërve” [3] .