Kisha e “Shën Mërisë“, në Malçan të Sarandës

Kisha e "Shën Mërisë" gjendet në fshatin Malçan. Kisha përbëhet nga naosi dhe narteksi. Naosi është në formë kryqi me kupolë dhe ka përmasa të brendshme 6.60x5.90 metra. Muratuara e kishës është e ndërtuar me gurë dhe është veshur me një shtresë llaçi. Janë lënë të pambuluar qoshet e kishës, të cilat janë punuar me gurë të mëdhenj dhe të latuar. Muratura përfundon me një kornizë në formë dhëmbësharre. Tamburi i kishës përmban dymbëdhjetë nike dhe dritare të mbuluara me harqe tullash. Mbi to gjendet një friz i rrafshët i dekoruar me copa tjegullash. Duke u nisur nga karakteri i dekoracioneve të tamburit mendohet që kisha të jetë ndërtuar rreth shek. XVII[1].

Ambienti i altarit ndahet nga një ikonostas druri, i cili është gdhendur në vitin 1822. Këtë fakt e vërteton mbishkrimi që gjendet mbi ikonostas: Ανεκενίσθησαν καί έστωρίθυσαν ή πάνσεμνες ήκόνες καί ό τέμ(π)λος καί / διά σινδρομής τού Παπά Πάνου καί Κύρ Χρίστου Τζίκα έπιτρόπον / έν έτει 1822 αύγούστου 10 καί διά χ(ε)ιρός έμού Δημητρίου έκ Στάρι / τσάνη. “U përtërinë dhe u pikturuan ikonat e nderuara dhe ikonostasi me kontributin e zotit Papa Panos dhe zotit Kristo Çika, epitropëve, në vitin 1822 gusht 10. Me dorën time të Dhimitrit nga Stariçani”[2].