Historiku në zanafillë i gjimnazit “Kostandin Kristoforidhi”

Ideja për të krijuar këtë material me të dhëna mbi gjimnazin “Kostandi Kristoforidhi”, më erdhi pasi gjatë një kërkimi në google për të, nuk gjeta asnjë të dhënë. Edhe ky gjimnaz në radhën e gjimnazeve të tjerë të vendit tonë, ka kontributin e tij. Pas 36 vitesh mungese, po sjell diçka që mund të vlejë si informacion apo edhe kujtesë e bukur për dikë. Po rendis disa të dhëna:

• Kohën kur filloi për herë të parë me këtë emër;
• Mësuesit e parë që dhanë mësim aty;
• Sa nxënës janë regjistruar dhe diplomuar për disa vite me radhë etj.

Mbase edhe të tjera të dhëna do të renditet më pas nga ata që mund të dinë më shumë e që i kanë përjetuar nga afër këto kohë.

Unë e ndjeva këtë lloj “detyrimi”, për faktin që kam qenë nxënëse e maturës së parë të këtij gjimnazi dhe ndërkohë prej vitesh jam mësuese në atë gjimnaz, përkrah shumë mësuesve të nderuar e të shkëlqyer. Jo më kot renditet ndër gjimnazet më të mirë të qytetit e të vendit.

Godina ku gjendet sot gjimnazi “Kostandin Kristoforidhi”, fillimisht ka qenë ndërtesë e gjimnazit “Dhaskal Todri”, i cili në vitet 84-85 u zhvendos në godinën e re, ku është edhe tani.

Godina e vjetër u përdor pjesërisht edhe më pas, deri në vitin 85-86 si vijim i gjimnazit “Dhaskal Todri” (kati i parë), pasi akoma godina e re kishte mungesat e saj; kati i dytë dhe i tretë ishte shkollë dyvjeçare profesionale.

Në vitin 1986 u ndie nevoja e krijimit të një gjimnazi të ri, përkrah atij ekzistues (Dhaskal Todri), pasi ishte rritur numri i nxënësve që donin të ndiqnin gjimnazin. Kjo ishte koha kur hapi dyert gjimnazi “Kostandin Kristoforidhi”.

Emrin i tij “Kostandin Kristoforidhi”, u mendua si një nga emrat me kontribut të rëndësishëm në Elbasan e mbarë vendin. Për këtë arsye, iu mor shkollës 8-vjeçare që gjendej në kala dhe kishte emrin “Kostandin Kristoforidhi” dhe iu vu gjimnazit. Shkollën 8-vjeçare, e quajtën “Tush Pina”, një shkollë që me kalimin e viteve u mbyll fare.

Drejtori i parë i gjimnazit “Kostandin Kristoforidhi”, ishte Filip Nanushi i cili e drejtoi shkollën deri në vitin shkollor 1991-1992. Më pas, për një vit u drejtua nga Bashkim Gjevori; pas tij me radhë Fuat Xhomaqi, Gazmend Haxhiymeri etj.

Vitin e parë të hapjes së shkollës 1986-1987, u regjistruan  233 nxënës për herë të parë me kriter përzgjedhës gjuhët e huaja (frëngjisht dhe rusisht), nga ku morën diplomën 140 nxënës në vitin shkollor 1989-1990.

Në vitin 1989-1990, gjimnazi u rrit shumë në numër nxënësish gradualisht, dhe për këtë arsye filloi mësimi me dy turne. Në një bisedë me ish-nëndrejtorin i atij gjimnazi që në fillimet e tij, profesor Tauland Zaimin, na tregon se si në këtë vit (1989-1990) u hapën 12 paralele vetëm vitin e parë. Kështu lindi nevoja e krijimit të një gjimnazi të ri.

Në 1991 u krijua gjimnazi “Ahmet Dakli”, i cili u vendos te ndërtesa e ish-Institutit të Lartë “Aleksandër Xhuvani”. Në atë vit, vijon prof. Landi, zgjedhja e drejtuesve u bë me propozim dhe miratim të kolektivit. Nga nëndrejtor i gjimnazit “K. Kristoforidhi”, prof. Landi kaloi drejtor në gjimnazin “Ahmet Dakli” ku me vështirësi u bë zhvendosja totale e institutit në ndërtesën e re (ajo që është sot universiteti) dhe rikrijimin e bazës materiale për një gjimnaz të ri që fillonte rrugën e tij.

Lidhur me mësuesit dhe nxënësit e gjimnazit “A. Dakli” na tregon prof. Landi, ato u morën nga gjimnazi “K. Kristoforidhi” duke u ndarë përgjysmë (mësuesit dhe nxënësit). Kështu për tek “A. Dakli”, shkuan mësues me eksperiencë si: Bardhoshe Voci, Gëzim Nushi, Olimbi Lika, Aneta Beqiri etj. Shumë shpejt ky gjimnaz filloi konkurrencën me dy gjimnazet e para, por bërthama e tij është krijuar nga gjimnazi “K. Kristoforidhi” siç e përmendëm më lart.

Më poshtë po rendis disa nga emrat e mësuesve të parë që filluan mësimin në këtë gjimnaz. Këto të dhëna janë marrë nga regjistrat e ZVA Elbasan, që na u vunë në dispozicion. Në këtë listë ka edhe mësues që jepnin mësim në shkollën e natës, pasi po te godina e gjimnazit “K. Kristoforidhi” ishte edhe shkolla e natës që nga 1986. Më parë shkolla e natës ishte te Q. Stafa, dhe u rikthye atij përsëri në vitin 1989-1990.

Disa prej mësuesve unë i kujtoj me shumë respekt si mësuesit e mi dhe nuk më është dashur ndihmë për të dhënë ndihmesë në lëndët që ato jepnin në shkollë. Për disa të tjerë, mora ndihmën e profesoriTauland Zaimit, mësuesit tim të matematikës prej 4 vitesh, tashmë në pension, por gjithmonë plot energji. Disa prej tyre mund edhe të plotësohen në tabelë me të dhëna që u mungojnë. Të dhënat e mbledhura nga regjistrat e viteve 1986-1993, janë përdorur për të kuptuar se kur e kanë nisur punën këta mësues dhe nëse nuk janë në regjistrin vijues, kemi menduar se nuk janë më mësues të asaj shkolle. Regjistrat e përdorur janë për efekt pagash, dhe nuk kanë shumë informacion që do të na duhej neve. Gjithsesi shpresojmë që të jetë sa më afër të informacionit të saktë.

Nxënësit e regjistruar dhe që janë diplomuar nga 1886-2011

Nga regjistrat e amzës në shkollën “K. Kristoforidhi”, morën numrin e nxënësve të regjistruar në vite në këtë gjimnaz. Jemi përpjekur të krijojmë një tabelë të dhënash se sa ishte numri i të regjistruarve dhe sa prej tyre janë diplomuar. Në atë kohë njihej fenomeni i mbylljes së klasave nga viti i parë deri në vitin e katërt. P.sh. nëse në fillim janë regjistruar 233 nxënës, në fund janë diplomuar 140 prej tyre.

Maturantët e parë

Në këtë tabelë, kam renditur sipas regjistrit të parë të këtij gjimnazi, ata që janë maturantët e parë të tij.