Emin Kokalari (1886-1943)

Emin Kokalari lindi në Gjirokastër, më 1 janar 1886. Pas përfundimit të studimeve të larta për drejtësi në Universitetin e Selanikut shërbeu si nëpunës "Tatbikat" në zyrën e ekzekutimit në Stamboll. Më pas u largua nga detyra administrative dhe u vendos në Izmir ku ushtroi profesionin e avokatit për rreth 3 vjet.
Me shpalljes e pavarësisë dhe krijimin e shtetit të ri shqiptar u emërua gjykatës në gjykatën e Vlorës dhe më pas në atë të Ballshit. Duke filluar nga viti 1916 iu kthye avokatisë në qytetin e lindjes, Gjirokastër, ku shquhej për profesionalizëm të lartë. Aftësitë e tij u shfrytëzuan nga shteti duke e ngarkuar me detyrën e noterit publik.
Në duart e tij kaloi dhe u përpilua gjithë dokumentacioni i pronave të familjeve në rajonin Gjirokastër. Përveç profesionalizmit, ndershmërisë, saktësisë dhe marëdhënieve të besueshmërisë absolute, dokumentet e përpiluar nga Emini dallohen edhe për kaligrafinë dhe estetikën mbresëlënëse. Ai ishte gjithashtu një njeri mjaft social dhe orator. Kultura e tij nuk mund të pajtohej me hovin që kishin marrë idetë komuniste në vitet '30 dhe '40, prandaj hapur u pozicionua kundër. Porse fjalës, së njerëzve të ditur, kundërshtarët politikë iu përgjigjën me dhunë. Kjo ndodhi edhe me Eminin. Emin Kokalari do të ishte njeri prej të ekzekutuarve në maskrën makabre të kryer në Gjirokastër, më 18 nëntor 1943 nga forcat partizane të komanduara prej Shemsi Totozanit.