Vehap Xhindoli (1942-2021)

Vehap Xhindoli, sportisti dhe poligloti i vlerave qytetare

Vehap Xhindoli ka lindur më 7 qershor 1942 në fshatin Imshtë të Lushnjës dhe jetoi, punoi dhe banoi në qytetin e Elbasanit. Në rininë e tij u mor me sportin e ngritjes së peshave. Ka qenë pjesëmarrës në shumë kampionate kombëtare, duke fituar 32 tituj. Më pas, për merita të spikatura ka qennë edhe gjyqtar ndërkomëtar në peshëngritje.

Vehap Xhindoli  ka marrë shumë tituj  si: “Mjeshtër Sporti” në vitin 1964, “Mjeshtër i merituar i Sportit” në vitin 1965. Fitoi liçensën e gjyqtarit ndërkombëtar të peshëngritjes më 1999. Mori titullin  “Nderi i Sportit Shqiptar” nga Presidenti i Republikës në vitin 1999.

Është vlerësuar nga Presidenti Olimpik Ndërkombëtar, Julio Antonio Saranç, për kontributin e tij në peshëngritje në vitin 2002

Vlerat e këtij intelektuali njihen edhe si përkthyes shumë i mirë nga gjuhët frëngjisht, gjermanisht dhe rusisht, si dhe autor i librit “Kujtesa e  moçme popullore”.

Pasi mbaroi vitin e dytë të shkollës fillore në fshatin e lindjes, në vitin 1951, vjen me banim në qytetin e Elbasanit. Pasi mbaroi vitin e dytë të shkollës së mesme, për nevoja ekonomike e la shkollën dhe vazhdoi shkollën dyvjeçare profesionale në qytetin e Korçës.

Në vitin 1959 filloi punë në ish-parkun e mallrave në Elbasan si mekanik. Në vitin 1951 mbaroi vitin e tretë gjimnaz pa shkëputje nga puna dhe po atë vit nisi punën në fushën e sportit të ngritjes së peshave në kampionatin kombëtar. Trajneri I parë i tij ka qenë mjeshtri i madh i sportit Dhimitër Nani, që i ofroi stërvitjen rregullisht në këtë sport.

Në kampionatin kombëtar të zhvilluar në vititn 1962 në Gjirokastër, konkuroi me ekipin e Elbasanit, në peshën e mesme 82 kg dhe zuri vendin e dytë në Republikë, ndërkohë që vendin e parë e zuri mjeshtri i madh i sportit Enver Krujani, i cili ishte sportist i klubit sportiv “Tiranës”.

Në vitin 1963, u thirr në shërbimin ushtarak pranë klubit sportiv “Partizani” dhe po atë vit konkuroi në peshën gjysmë të rëndë, me mjeshtrin absolut të Shqipërisë, Telat Agolli, duke zënë vendin e dytë.

Në vitin 1964 mori pjesë në garat individuale që u zhvilluan në qytetin e Vlorës dhe zuri vendin e parë, duke thyer njëkohësisht rekordet absolute të peshës së rëndë, që i mbante mjeshtri i sportit Telat Agolli.

Në anketën e pesë sportistëve më të mirë të vendit, në vitin 1965, fitoi vendin e tretë. Gjatë vitit, kishte thyer shume rekorde kombëtare.

E larguan nga klubi sportiv “Partizani” në vitin  1966, për arsye politike.

Ka marrë titullin  e “Kampionit të Republikës” në peshën gjysmë të rëndë dhe të rëndë për 10 vjet rresht deri në vitin 1975. Seria e thyerjes së rekordeve kombëtare, nëpër kampionate kombëtare ka qenë e domethënëse.

Në vitet ’70 Vehap Xhindoli organizoi edhe Cirkun e Elbasanit që i dha emër të nderuar dhe e bëri të njohur për aktivitetet që organizonte edhe në argëtimin e rinisë. Po ashtu njëherazi ngriti edhe ekipin e peshëngritjes të të rinjve dhe në vitin 1971, dhe në bashkëpunim me ekipin e ngritjes së peshave të Cërrikut me trajner mikun e tij Perikli Kristidhi, u bënë pejsëmarrës në kampionatin e parë të të rinjëve në Tiranë ku zuri vendin e dytë.

Në 1990 ka qenë edhe trajner i ekipit të pëshëngritjes dhe që prej asaj kohe e nuk aktivizohet më me asnjë aktivitet në sportklubin “Elbasan”

Momentin më të keq të jetës së tij e ka përjetuar në maj të vitit 1965, kur ishim grumbulluar me ekipin kombëtar të peshëngritjes për të shkuar në Kinë dhe nuk e lejuan për arsye politike, edhe pse në atë kohë ka  qenë kampion absolut i vendit. Ndërsa momenti më i bukur ka qenë kur në dhjetor të vitit 1965, në kampionatin kombëtar që u zhvillua në Berat konkuroi me Telat Agollin në peshën e rëndë pasi ka pirë 8 litra ujë për 15 min dhe pas konkurimit zura vendin e parë.

Njihet si një nga njerëzit e fortë në fushën sportive me një kurajo të jashtëzakonshme dhe kurajo serioze për të arritur çdo objektiv që i vinte vetes.

Zotëronte me këmbëngulje disa gjuhë, frëngjisht, gjermanisht, rusisht, anglisht dhe kishte njohuri edhe për greqishten dhe si një poliglot autodidact, botoi edhe libra me përkthime.

Ishte një njeri me kurajo të madhe dhe i mirënjohur në opinionin qytetar edhe si një njeri i letrave që e vazhdonte me pasion përkthimin.