Xhaferr Shehu (1905 - 1970)

Xhafer Shehu lindi në Elbasan, në vitin 1905.
E nisi udhën e mësuesisë në vitin 1928, në skajin më jugor të vendit, në Konispol, ku shërbeu plot tre vjet.
Më pas e transferuan  në Dibër, në internatin e Kastriotit, një nga katër shkollat që pushteti mbretëror pati hapur në veri dhe në verilindje të vendit.
Nga Dibra mësues Xhafën, siç e thërrisnin të gjithë, e sjellin në Elbasan, fillimisht në shkollën fillore "Naim Frashëri", në godinën që njihet si shkolla e Tëbojës dhe me pas në shkollat "Agimi" dhe "Zgjimi".
Pas luftës, shërbeu në shkollat "Sul Misiri", "Ptoleme Xhuvani", "Bardhyl Popa", "Naim Frashëri". Për dy vjet ka qenë nëndrejtor në Politeknikumin "7 Nëntori" në Tiranë dhe njëkohësisht ka qenë edhe drejtor i konviktit të asaj shkolle, në vitet 1948 - 1951.
Deri në vitin 1967, kur doli në pension, qe drejtues i arsimit 7-vjeçar pa shkeputje nga puna.
Tek mësues Xhafa kushdo shihte kompetencën profesionale, pasionin dhe egzigjencën në punë, maturi dhe marrëdhënie të shëndosha me nxënësit e kolegët.
Edhe pasi mbushi moshën e pensionit, atë e mbajtën në punë edhe 7 vite të tjera. Ky ishte shpërblimi më i madh për këtë mësues të devotshëm.
Fakti që ai vinte nga një familje klerikale, ishte arsye që pushteti komunist të tregohej jo dashamirës për vlerësimin e punës së Xhaferr Shehut.
Xhaferr Shehu nuk gëzon titullin "Mesues iMerituar".
Ka kryer edhe detyra shoqërore si: Sekretar i bashkimeve profesionale të asaj kohe, ka qenë po ashtu kryetar i Kontroll - Revizionimit, si dhe sekretar i këshillit të lagjes "Sulejmanie" (Sot lagja Aqif Pasha).
Ndërroi jetë në vitin 1970.
Një nga ish - nxënësit e tij nga internati, Xhavit Shpata, mbi mbresat që ruante për shkollën dhe drejtorin Xhaferr Shehu thotë: "...Nuk di pse s'donim ta ndanim nga sytë drejtorin tonë. Kur qendronte para nxënësve, pamja e tij na shokonte. Tek ai gjitheshka shkelqente! Sa simpatik, aq shik e i rregullt në veshje. Fytyra e tij e pastër si bora e maleve tona, flokët gjithmonë të krehura, këpucët e lyera me bojë, që shkëlqenin..."